Chubri entrr den dée rézôt d’tèrminolojî
Den l’chan d’sée mision e pourr aboni sn’ouvraij dë trlatrî, Chubri qmensi en 2008 a s’ghimente su lée rézôt pourr echanje entourr du travây d’ensèrch tèrminolojiq. Chubri s’rendi prmier la 4m préechrî du Souèton Uropièn d’Tèrminolojî a Gatineau ô Qhebeq lée 7 e 8 d’oqtobr su l’tem S’uni pourr qraye. Ste renqontr pèrmi dë s’forme e d’së ghimente, e pée d’entame dée qontaq o d’z’espesialist d’aotr lang.
Du 21 ô 25 du mouè d’oqtob, Chubri s’rendi a Lanusé en Sardèngn pourr sieudd un seminérr dë LinMiTer, un rézot soutinz parr l’Union Latinn e qhi ragrou dée lang romann uropienn minoritérr. Un ensegnment d’touèz jour porti su la qrayézon d’môt nouviao e su la tèrminolojî. I fu done parr la Cristina Bofill dë TermCat (Qatalogn). Duran lée deûz z’aotr journée, l’mondd qhi tein przent s’entrqaozirr su la sayanss dë lou lang en liézon do l’ouvraij tèrminolojiq.
L’jeudi 18 dë desenbr a Pariz, i’u ùnn préechrî organizée parr la Sosiete Fransézz dë Tèrminolojî su l’idée d’politiq langaijierr. Bèrtran Ôbrée, lë mnou d’Chubri, yi fi invite a fèrr ùnn préchée su la sayanss du galo en 2008 e lée z'aji mne parr lë souèton.
Chubri trlatt dë qae
Dedpée 2007, Chubri a trlate du qae en galo, rèn q’a la dmandd :
Haott Eqoll dë Nântt (1err Journée d’Etudd Galézz, 06-2007)
Muziq e Danss en Brtèngn (gâzètt Résonnances, limerot 01-2008)
Qontrée d’Brtèngn (ensegn sieudû parr lë sèrviss Armana 21, 2008)
Vill dë Renn (letr e qartt pourr deûz z’elû, 2008)
Gâzètt Bala (non d’qomùnn, limerot 10/11-2008)
Ar Vuez (program 03-2009)
Bodadeg ar Sonerien (qonqourr 2009)
(...)
Chubri s’ée minzz itou a trlate du galo dvèrr lë franséez pourr dée doqhumentérr dë tele (sourtitr d’intèrviou) :
Raportaij dë Bernez Quillien su l’galo pourr l’emision Red an Amzer, pâse su Franss 3 Galèrnn lë 8 dë juin 2008
Fim doqhumentérr dë Roland Michon
« Lettres à un gallèsant », pourr pâse lée prmierr fai du 18 ô 26 dë fevrier 2009 su TV Renn 35
<29-01-2009>
A Lanusé en Sardèngn…
… un ensegnment done parr Cristina Bofill dë TermCat.
